by 
चंद्रपूर, दि ९ एप्रिल : शहरात दरवर्षी चैत्र पोर्णिमेला चंद्रपूरची आराध्य दैवता माता महाकालीच्या ऐतिहासीक महाकाली मंदिर परिसरात भव्य यात्रा भरते. यंदा महाकालीच्या यात्रेला ११ एप्रिलपासून प्रारंभ होत आहे. अनेक वर्षांची परंपरा लाभलेल्या या यात्रेची राज्यभरातील भाविक आतूरतेने वाट पाहत असतात. अखेर प्रतीक्षा संपून ही यात्रा सुरू होत असल्याने राज्याच्या विविध भागातून भाविक चंद्रपुरात दाखल होणे सुरू आहे.
सध्या लोकसभा निवडणुकीची धामधूम सुरू आहे. मनपा प्रशासनाचे अधिकतर कर्मचारी निवडणूक कार्यात व्यस्त आहेत. असे असले तरी मनपा प्रशासनाने या यात्रेसाठी जय्यत तयारी केली आहे तसेच या यात्रेकडे व भाविकांच्या सुविधांकडे लक्ष ठेवून आहे.
या दृष्टीने चंद्रपूर शहर महानगपालिका आयुक्त संजय काकडे यांनी सकाळी 10 वाजता यात्रा परिसरातील कामकाजाची पहाणी केली. येणार्या वाहनामूळे वाहतूक कोंडी होऊ नये म्हणून झरपट बंधारा, बैलबाजार भाग, गौतमनगर सुलभ शौचालय व शासकीय अध्यापक विद्यालय जवळील जागांची पार्किंग संबंधी व्यवस्थेबाबत पाहणी केली व आवश्यक सूचना अधिकाऱ्यांना दिल्या. महानगपालिका प्रशासनातर्फ़े झरपट पात्रातील इकोर्निया वनस्पती काढून पात्र स्वच्छ करण्यात आलेले आहे, बैलबाजार भागात पटांगणाची पूर्णतः सफाई करण्यात आली असून याच भागात भक्तांकरिता मांडव टाकण्याचे काम सुरू झालेले आहे, झरपट बंधाऱ्याच्या रंगरंगोटीचे कार्यही लवकरच सुरू होत आहे. सुमारे महिनाभर चालणाऱ्या या उत्सवा दरम्यान नागरिकांनी प्रशासनाला सहकार्य करावे, असे आवाहन मनपा प्रशासनाने केले आहे.
याप्रसंगी सहायक आयुक्त धनंजय सरनाईक, शहर अभियंता महेश बारई, शाखा अभियंता हजारे, स्वच्छता निरीक्षक विवेक पोतनूरवार, भुपेश गोठे उपस्थित होते,
