by स्वनिधीतून लस खरेदीच्या परवानगासाठी मुख्यमंत्र्यांना पत्र
महापौर दयाशंकर तिवारी यांची पत्रकार परिषदेत माहिती : तिस-या लाटेपूर्वी संपूर्ण नागपूरकरांच्या लसीकरणासाठी मनपाचे शर्थीचे प्रयत्न
नागपूर, ता. ६ : नागपूर शहरात कोरोनाचा संसर्ग वाढत आहे. दुसरीकडे लस उपलब्ध होत नसल्यामुळे नागरिकांना मोठा त्रास सहन करावा लागत आहे. कोरोनाची ही दुसरी लाट ओसरल्यानंतर तिसरी लाट सुद्धा येण्याची शक्यता तज्ज्ञांद्वारे वर्तविण्यात आली आहे. अशा स्थितीत लस हेच मोठे शस्त्र असून तिस-या लाटेपूर्वी नागपूर शहरातील सर्व नागरिकांचे लसीकरण व्हावे यासाठी केंद्र आणि राज्य शासनाच्या कोट्याव्यतिरिक्त नागपूर महानगरपालिका स्वनिधीतून निधी खरेदी करण्यास तयार आहे व त्यासाठी परवानगी देण्यात यावी, याबाबत मुख्यमंत्री उद्धव ठाकरे यांना पत्र पाठविण्यात आले आहे, अशी माहिती महापौर दयाशंकर तिवारी यांनी दिली. नागपूर शहरातील लसीकरणाला गती मिळावी यासाठी मुख्यमंत्र्यांना पाठविण्यात आलेल्या पत्रासंदर्भात आयोजित पत्रकार परिषदेमध्ये ते बोलत होते. यावेळी सत्तापक्ष नेते अविनाश ठाकरे, ज्येष्ठ नगरसेवक सुनील अग्रवाल उपस्थित होते.
महापौरांनी सांगितले की, कोरोनाची तिसरी लाट येण्याची शक्यता असून ती दुस-या लाटेपेक्षाही घातक असण्याची शक्यता तज्ज्ञांमार्फत वर्तविण्यात आली आहे. अशा स्थितीत सुरक्षेसाठी लस हे अत्यंत आवश्यक असून नागपूरकर जनतेच्या सुरक्षेच्या दृष्टीने मनपाने महत्वाचे पाउल उचलले आहे. तिस-या लाटेपूर्वी शहरातील सर्व नागरिकांचे लसीकरण व्हावे यासाठी केंद्र व राज्य शासनाकडून प्राप्त होणा-या लसींशिवाय मनपाला स्वनिधीतून लस खरेदी करण्याची परवानगी दिल्यास नागपूर शहरातील लसीकरणाला गती प्रदान होईल व सर्व नागपूरकरांचे लसीकरण गतीशीलतेने पूर्ण होउ शकेल, असे सांगतानाच पहिल्या टप्प्यामध्ये नागपूर महानगरपालिका १० कोटी निधी खर्च करण्यास तयार असून पुढे पुढे सुद्धा निधीची व्यवस्था केली जाईल, असे पत्रात नमूद केले असल्याचेही महापौर दयाशंकर तिवारी यांनी सांगितले.
संपूर्ण नागपूरकरांचे सुरळीत लसीकरण व्हावे यासाठी लस खरेदीसाठी निधीच्या संकलनासाठी शहरातील सर्व खासदार, आमदार, नगरसेवक यांना विनंती करण्यात आले असल्याचे सुद्धा महापौरांनी सांगितले. शहरातील सर्व नगरसेवकांनी त्यांच्या विकास निधीतून १० लाख रुपये तसेच इच्छूक नगरसेवकांनी आपल्या मानधनातील काही निधी लस खरेदी करण्यासाठी ‘महापौर सहायता निधी’मध्ये देण्यासाठी पत्र द्यावे. सर्व नगरसेवकांनी स्वेच्छेने विकास निधी अथवा अन्य निधीमधून १० लक्ष रूपये दिल्यास लस खरेदी करण्यासाठी मनपाकडे १५ कोटी रुपयांची व्यवस्था होईल. याशिवाय शहरातील सर्व खासदार यांनी त्यांच्या खासदार निधीतून रुपये दोन कोटी तर आमदारांनी आमदार निधीतून रुपये एक कोटी चे सहकार्य करण्याबाबत पत्र देण्यात आले. त्या पत्राला त्वरीत प्रतिसाद देत विधानसभेचे विरोधी पक्षनेते देवेंद्र फडणवीस यांच्यासह आमदार प्रवीण दटके व आमदार मोहन मते यांनी प्रत्येकी १ कोटी निधी देण्याचे पत्र दिले आहे. शहरातील सर्व खासदार, विधानसभा व विधानपरिषद सदस्य यांनी निधी दिल्यास त्यातून पुन्हा १५ कोटी रुपयांची व्यवस्था होउ शकेल. सगळी निधी मिळून १० लाख लोकांच्या लसीकरणाची व्यवस्था नागपूर महानगरपालिका करू शकणार आहे. याशिवाय नागपूर शहरातील उद्योजक, कॉर्पोरेट क्षेत्रातील व्यक्तींनी त्याचा सीएसआर निधी लस खरेदी करण्यासाठी द्यावा. तसेच शहरातील जी व्यक्ती लस खरेदी करू शकतात त्यांनी मनपाच्या लसीकरण केंद्रावरून नि:शुल्क घ्यावी. मात्र इतर नागरिकांनाही लस मिळावी यासाठी स्वेच्छेने लसीला लागणारे शुल्क ‘महापौर सहायता निधी’मध्ये जमा करावे, असेही आवाहन महापौर दयाशंकर तिवारी यांनी केले आहे.
‘महापौर सहायता निधी’मध्ये निधी जमा करा
नागपूर शहरातील नागरिकांच्या सुरक्षेच्या दृष्टीने शहरातील शंभर टक्के लसीकरण व्हावे यासाठी नागपूर महानगरपालिकेद्वारे पुढाकार घेण्यात आला आहे. या पुढाकारामध्ये शहरातील लोकप्रतिनिधी, व्यावसायीक, उद्योजक, कॉर्पोरेट क्षेत्रातील मान्यवर, सधन नागरिक या सर्वांनी स्वेच्छेने ‘महापौर सहायता निधी’मध्ये सहकार्य करण्याचे आवाहन महापौर दयाशंकर तिवारी यांनी केले आहे. ‘महापौर सहायता निधी’ बँक ऑफ महाराष्ट्र, सिव्हिल लाईन्स नागपूर, IFSC Code क्रमांक - MAHB0001195, बँक खाते क्रमांक - 60346554131 (खाते प्रकार - बचत) येथे निधी जमा करण्याचे आवाहनही त्यांनी केले आहे.
