by
मूल/प्रतिनिधी:
जंगला शेजारी असलेल्या शेतात बैल बांधण्या करीता गेलेल्या एका तरुण शेतकऱ्यावर वाघाने हल्ला केला. वाघाचा हल्ल्यात शेतकरी गंभीर जखमी झाल्याने त्याला मूल येथिल उपजिल्हा रूग्णालयात उपचारासाठी दाखल करण्यात आले. जखम गंभीर असल्याने प्राथमिक उपचार करून त्याला पुढील उपचारासाठी चंद्रपूर येथिल जिल्हा रूग्णालयात पाठविण्यात आले आहे. जखमी झालेल्या युवकाचे नाव प्रकाश ठाकरे वय 23 असून मूल तालुक्यातील भंजाळी येथिल रहिवासी आहे.
ही घटना आज सकाळी 8 वाजताचे दरम्यान घडली. मूल तालुक्यातील भंजाळी या गावात प्रकाश ठाकरे या शेतकऱ्याचे शेत आहे. शेताला लागून जंगल असल्याने या परिसरात वन्यप्राण्यांच्या नेहमीच वावर असतो. आज ता. 19 सकाळी नेहमी प्रमाणे प्रकाश आपल्या शेतात बैल बांधण्याकरीता गेला होता. बैल बांधत असतांना अचानकपणे वाघाने त्याचावर हल्ला केला. बेसावध अवस्थेत वाघाचा हल्ला झाल्याने घाबरलेल्या प्रकाशने आरडाओरड केली. वाघासोबत झालेल्या झटापटीत प्रकाशला गंभीर जखमा झाल्या. प्रकाशचा आरडाओरडमुळे शेजारील शेतात काम करणारे शेतकरी तसेच गावातील नागरिक धाऊन आले.
त्यामुळे वाघ जंगलात पळून गेला. गावकऱ्यांच्या मदतीने जखमी प्रकाशला मूल येथील उपजिल्हा रूग्णालयात आणण्यात आले. सदर घटना पोंभूर्णा वनपरीक्षेत्राच्या हद्दीतील आहे. या घटनेमुळे गावक—यांत भितीचे वातावरण पसरले आहे. घटनेची माहिती मिळताच पोंभूर्णा घटनास्थळी जाऊन घटनेचा पंचनामा केला. यावेळी (घोसरी) पोंभुर्णाचे क्षेत्र साहायक ए.बी.पालीकोंडावार, वनरक्षक जी.एल.आळे उपस्थित होते.
