चंद्रपूर/प्रतिनिधी:
जिल्ह्यातील वरोरा व मूल येथील उपविभागीय पोलीस अधिकाऱ्यांच्या रिक्त झालेल्या जागांवर नियुक्तीचे आदेश सोमवारी निघाले आहे. वरोरा येथे पोलीस उपविभागीय अधिकारी म्हणून नागपूरच्या नागरी हक्क संरक्षण विभागाचे पोलीस उपअधीक्षक सरदार नामदेव पाटील यांची नियुक्ती करण्यात आली आहे. तर मूलचे उपविभागीय पोलीस अधिकारी म्हणून नागपूरच्या पोलीस प्रशिक्षण केंद्राचे पोलीस उपअधीक्षक रमेश भागवतराव तायवडे यांची नियुक्ती झाली आहे.
मूल येथे उपविभागीय पोलीस अधिकारी डॉ. हिरे यांचे काही दिवसांपूर्वीच स्थानांतरण झाले होते. तर वरोरा येथील उपविभागीय पोलीस अधिकारी प्रताप पवार हे सेवानिवृत्त झाल्याने दोन्ही जागा रिक्त झाल्या होत्या. सध्या लोकसभा निवडणुकीचा कालावधी असल्यामुळे शासनाने राज्यातील १८ पोलीस उपअधीक्षक व सहाय्यक पोलीस आयुक्तांच्या बदल्यांचे आदेश काढले आहे. यामध्ये वरोरा व मूल येथील उपविभागीय पोलीस अधिकाऱ्यांच्या रिक्त झालेल्या जागेवर नवीन अधिकाऱ्यांच्या नियुक्तीचा समावेश आहे. आदेशातील नियुक्तीच्या ठिकाणी संंबंधित अधिकाऱ्यांना कोणतीही रजा न घेता तत्काळ कार्यभार स्वीकारावा लागणार आहे.