by
चंद्रपूर/प्रतिनिधी:
पैशाच्या लालसेपोटी मुलाने घरालगतच्याच शेतात वडिलाचा गळा आवळून खून केला व नंतर नैसर्गिक मृत्यूचा देखावा करून अंत्यसंस्कारही उरकल्याची घटना सिंदेवाही तालुक्यातील मिनघरी गावात २२ जुलै रोजी घडली. दरम्यान, बहिणीला याबाबत संशय आल्याने दोन दिवसानंतर तिने पोलीस ठाणे गाठून तक्रार केल्याने घटनेच्या चार दिवसानंतर हे प्रकरण उघडकीस आले. याप्रकरणी आरोपी मुलास अटक करण्यात आली आहे.
वडिलांनी मुलाला दिलेल्या रकमेचे काय केले ही विचारणा केली असता त्याने वडिलांचा कायमचा काटा काढण्याचे ठरवले. २२ जुलैला २ साथीदारांना सोबत घेऊन रात्री साडेसात वाजता घराशेजारीच असलेल्या शेतात वडिलांचा गळा आवळून खून केला. राजेशने वडिलांचा मृत्यू आकस्मिक झाला असल्याचा बनाव करुन त्यांच्या मृतदेहाला अग्नी दिली.मात्र मुलगी वैशाली दादाजी खोब्रागडे हिने भावाच्या कृत्याचा भांडाफोड केला, वडिलांचा मृत्यू आकस्मिक नसून हत्या करण्यात आल्याची तक्रार पोलिसात दिली.
यानंतर पोलीस तपासात मुलगा राजेश यानेच वडिलांचा खून केल्याची धक्कादायक बाब समोर आली. याप्रकरणी आरोपीवर भारतीय दंड विधान कलम ३०२ आणि २०१ प्रमाणे गुन्हा दाखल करण्यात आला.
