नागपूर/प्रतिनिधी :
शुक्रवारी रात्री कर्तव्यावरून घरी परत जात असताना भरधाव वाहन चालकाने धडक दिल्याने एका तरुण पोलीस शिपायाचाजागीच मृत्यू झाल्याची घटना जुना कामठी मार्गावरील रतन टॉवरसमोर घडली. विशाल वसंतराव मानकर (वय ३२) असे मृत पोलीस कर्मचाऱ्याचे नाव आहे. विशाल लकडगंज पोलीस ठाण्यात कार्यरत होते. ते विनोबा भावेनगरात राहायचे जुना कामठी मार्गावरील रतन टॉवरसमोर त्यांच्या पल्सरला एका वाहनचालकाने जोरदार धडक मारली. त्यामुळे ते गंभीर जखमी झाले. पहाटे २ ची वेळ असल्याने या भागात वर्दळ नव्हती. मात्र गस्तीवर असलेल्या पोलिसांना दिसताच त्यांनी विशालला रुग्णालयात नेले मात्र डॉक्टरांनी त्यांना मृत घोषित केले. पोलीस कर्मचारी नामदेव सांगळे यांनी दिलेल्या तक्रारीवरून शांतिनगर पोलिसांनी अपघाताचा गुन्हा दाखल केला. आरोपी वाहनचालकाचा शोध घेतला जात आहे.