by 
दत्ताञय फडतरे (पुणे ) -
सध्याच्या धावपळीच्या जीवनात व्यायामावर भर देताना प्राणायम तसेच योगासने याचे प्रमाण ही समाजामध्ये मोठ्या प्रमाणात आढळते. आजची जीवनशैली जरी बदलली तरी व्यायामाची गरज आहेच. योग केल्याने शरीर व मन दोन्ही कसे सदृढ राहाते याचा अभ्यासच पुणे अग्निशमन दलाच्या जवानांनी नुकताच एका प्रशिक्षणातून केला. भारत स्वाभिमान न्यास, योग पंतजलि यांच्यातर्फे योग प्रशिक्षण आयोजित केले होते.
जवान कोणताही असो तो समाजाच्या रक्षणासाठी सदैव तत्पर व सज्ज असतोच. त्याकरिता त्याचे स्वास्थ्य सदृढ व ताण हलका करण्यासाठी अग्निशमन दलाच्या मुख्यालयात टप्प्याटप्प्याने प्राणायाम कसे करावे व ते का आवश्यक आहे त्याबाबत विविध आसने, आहार, विचार व आरोग्याची महत्वपुर्ण माहिती याचा सराव गेले महिनाभर देण्यात आला.
दलातील चारशेच्या वर जवानांनी याचा लाभ घेतला. कपाल भाती, अनुलोम विलोम, बस्ती व मंडूक आसन असे विषेश प्राणायम केल्यानंतर काय फरक जाणवतो याचा अनुभव जवानांनी प्रत्यक्ष घेतला.
या योग प्रशिक्षणाचे नियोजन अनुराधा चव्हाण व सहा. अग्निशमन अधिकारी दत्तात्रय नागलकर यांनी केले होते. तसेच योग शिक्षक श्रीकांत जगताप व आशा जगताप यांनी प्रशिक्षण दिले. अग्निशमन केंद्र प्रमुख राजेश जगताप यांनी आभार मानले.
