by नागपूर/प्रतिनिधी:
नागपूर महानगरपालिकेचे कार्यकारी अभियंता (स्लम) डी.डी. जांभुळकर यांच्यासह २४ अधिकारी-कर्मचाऱ्यांचा सेवानिवृत्तीबद्दल महापालिका प्रशासनाच्या वतीने सत्कार करण्यात आला.
मनपा मुख्यालयातील डॉ. पंजाबराव देशमुख स्मृती सभागृहात सत्कार सोहळ्याचे आयोजन करण्यात आले होते. नागपूर महानगरपालिकेत विविध विभागात कार्यरत २४ अधिकारी-कर्मचारी आज (ता. ३१) सेवानिवृत्त झाले. त्यांचा शाल, श्रीफळ, तुळशीचे रोपटे, स्मृतिचिन्ह व धनादेश देऊन सत्कार करण्यात आला. कार्यक्रमाला प्रमुख पाहुणे म्हणून अतिरिक्त आयुक्त रवींद्र ठाकरे, अतिरिक्त आयुक्त राम जोशी, अतिरिक्त आयुक्त अझीझ शेख, उपायुक्त डॉ. रंजना लाडे, उपायुक्त रवींद्र देवतळे, उपायुक्त राजेश मोहिते, सहायक आयुक्त (सामान्य प्रशासन) महेश धामेचा, प्रमुख अग्निशमन अधिकारी राजेंद्र उचके, शिक्षणाधिकारी संध्या मेडपल्लीवार, निगम अधीक्षक मदन सुभेदार, यावेळी उपस्थित होते.
सेवानिवृत्त अधिकारी कार्यकारी अभियंता डी.डी. जांभुळकर यांचा अतिरिक्त आयुक्त रवींद्र ठाकरे यांनी सत्कार केला. सेवानिवृत्त कर्मचाऱ्यांमध्ये कार्यकारी अभियंता स्थापत्य चंद्रशेखर धकाते, स्थापत्य अभियांत्रिकी सहायक आर. एम. राठोड, मुख्याध्यापिका कीर्ति वरकडे, सहायक शिक्षिका स्वयंप्रभा खातरकर, शालिनी ॲन्थोनी, अरुणा नगरारे, मेहनाज बेगम, ज्येष्ठ श्रेणी लिपिक माधुरी भालेराव, स्वच्छता निरीक्षक आर.जी. घोरमाडे, लिडींग फायरमन एच.आर. तळवेकर, कनिष्ठ लिपिक आर. ए. पाचघरे, गार्ड यादव वानखेडे, चपराशी सुरेश ठाकरे, दिलीप परिहार, खलाशी सूर्यभान सहारे, मजदूर पुंडलिक अवचट, हरिश्चंद्र नरड, चपराशी नर्मदा भेंडे, सफाई कामगार विजय मेश्राम, शोभा चिघोरे, तिजिया बक्सरिया सदाशीव वाहाणे यांचा समावेश होता.
सर्व सेवानिवृत्त कर्मचाऱ्यांचा सत्कार मान्यवरांच्या हस्ते करण्यात आला. याप्रसंगी बोलताना अतिरिक्त आयुक्त रवींद्र ठाकरे म्हणाले, आयुष्यभर केलेल्या सेवेची ही पावती आहे. मनपाच्या सेवेतून आज आपण निवृत्त होत असलो तरी कर्तव्यातून मात्र निवृत्त होता येत नाही. आपण आयुष्यभर नोकरीच्या माध्यमातून केलेल्या सेवेचा आम्ही आदर करतो. अशीच सेवा यापुढेही सुरू राहील, असा विश्वास त्यांनी यावेळी व्यक्त केला.
सत्काराला उत्तर देताना कार्यकारी अभियंता डी. डी. जांभुळकर यांनी मनपाप्रति कृतज्ञता व्यक्त केली. ते म्हणाले, नागपूर महानगरपालिकेला मी नेहमी आपले पालक समजले. प्रामाणिक काम करण्याची सवय महापालिकेनेच लावली. आपल्या कामातून वरिष्ठांचा विश्वास संपादन करू शकलो. येथील सर्व अधिकारी, कर्मचाऱ्यांनी आपल्याला खूप प्रेम दिले. त्याबद्दल ऋणी असल्याचे ते म्हणाले.
कार्यक्रमाचे संचालन जनसंपर्क अधिकारी अशोक कोल्हटकर यांनी केले.आभार डोमाजी भडंग यांनी मानले. यावेळी सहायक अधीक्षक मनोज कर्णिक, सहायक अधीक्षक दत्तात्रय डहाके, दिलीप देवगडे, दिलीप तांदळे यांच्यासह बहुसंख्य अधिकारी, कर्मचारी उपस्थित होते.
