by - 30 एप्रिल व 1 मे रोजी
- अध्यक्षस्थानी ज्येष्ठ कवी अरूण इंगवले
पुणे - पहिले अखिल भारतीय श्री संत संताजी व संत साहित्य संमेलन दि. 30 एप्रिल व 1 मे रोजी कै. नलिनी वसंतराव बागुल नगरी, राजीव गांधी ई लर्निंग नॅशनल स्कुल, शिवदर्शन चौक येथे आयोजित करण्यात आले आहे. संमेलनाच्या अध्यक्षस्थानी ज्येष्ठ कवी अरूण इंगवले, स्वागत अध्यक्ष उल्हास (आबा) बागुल, उद्घाटक म्हणून उपमहापौर शिरीष पन्हाळे व स्मरणिका प्रकाशन महिती संचालक व जनसंपर्क अधिकारी हेमराज बागुल यांच्या हस्ते होणार आहे, अशी माहिती तेली समाजाचे मोहन देशमाने यांनी शनिवारी आयोजित पत्रकार परिषदेत दिली.
या संमेलनाचे उद्घाटन दि. 30 रोजी दुपारी 4 वा. होणार आहे. यावेळी प्रा. राजेंद्र कुंभार-कोल्हापूर, सुभाष घाटे-नागपूर, रामनाथ साहु-उत्तर प्रदश (झाँसी), फुला बागुल-ज्येष्ठ साहित्यिक आदी मान्यवर वक्ते आपले विचार मांडणार आहेत. दि. 1 रोजी सकाळी 10 ते 1 वा. ‘श्री संत संताजी विचारधारा’ या विषयावर सत्रअध्यक्ष संत तुकाराम महाराज साहित्य अभ्यासक, औरंगाबाद-विजय गवळी यांच्यासह इतर मान्यवर मंडळी आपले विचार
मांडणार आहे. दुपारी 1 ते 2.30 वा. ‘स्त्री समतेसाठी संताचे कार्य व स्त्री संत’ या विषयावर सत्रअध्यक्ष विजयाताई मारोतकर-नागपूर यांच्यासह इतर मान्यवर वक्ते आपले विचार मांडणार आहेत. तसेच दुपारी 3 ते 4 वा. ‘मानव कल्याणासाठी श्री संत संताजी जगनाडे महाराजांनी केलेल्या कार्याचा खरा इतिहास अभ्यासण्याची आवश्यक्यता’ या विषयावर सत्रअध्यक्ष अनिल राऊत यांच्यासह इतर मान्यवर मंडळी आपले विचार मांडणार आहेत.
