by मुंबई/काव्यशिप ऑनलाईन:
संपात सामील न होता एसटी महामंडळाच्या मध्यवर्ती कार्यशाळेत काम करणाऱ्या कामगाराला मारहाण केल्याच्या आरोपावरून सहा संपकरी कामगारांविरुद्ध सिडको पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, एसटी मध्यवर्ती कार्यशाळेत १७ ऑक्टोबर रोजी पवन बाबासाहेब शेळके (रा. म्हाडा कॉलनी) हे ड्युटी करत होते. त्यावेळी महेश टेभरे, पप्पु कोटूरवार, शेख तालेब, जगदीश जाधव, विशाल तुपे, पांडूरंग पोतदार हे एस. टी. कामगार तेथे आले. त्यांनी शेळके यांना काम करण्यास मज्जाव केला. त्यांनी व इतरांना शेळके व इतर दोन कर्मचाऱ्यांना मारहाण केली.
शेळके यांच्या अंगावर जळालेले ऑइल टाकले. या मारहाणीत शेळके यांच्या उजव्या डोळ्यास जखम झाली आहे, या तक्रारीवरून सिडको पोलिस ठाण्यात सहा जणांविरुद्ध गुन्हा दाखल करण्यात आला.शेळके यांच्या तक्रारीवरून पोलिसांनी जमावबंदी आदेशाचे उल्लंघन, सरकारी कामात अडथळा आणणे याप्रकरणी संपात सहभागी असलेल्या सहा कामगारांविरुद्ध गुन्हे दाखल केले.
