मंगळवार, ऑगस्ट १८, २०२०

माझ्या सर्जा रं बिर्जा रं नांगर का पूजिला तू ?

नागपूर / अरुण कराळे ,(खबरबात)

माझ्या सर्जा रं बिर्जा रं नांगर का पूजिला तू ?

आलं कासरं गळ्यांत त्यात गुंतला पहा तू
ओढे नांगराचा फाळ वखरात पाय अडे
असं कसं रे नशिब ढेकळात धडपडे...
नाही दिली बोलीभाषा डोळ्यांतून तू बोलशी
मानेवर टाकलेले ओझे निमूट ओढशी
चारा दिला तर ठीक नाही दिला तर ठीक
बसे र वं थ करत खाल मानेने तू मूक...
मोट नाडा गेला तरी ओझे चुकतंच नाही
तुझ्या वाचून घराचे पान हालतच नाही
जुंपताच बिगी बिगी निघतो तू शेताकडे
कधी पोटासाठी पहा नाही घातले साकडे...
बारा महिने कुटार पावसाळ्यात गवत
मानून तू घेतो गोड मिळेल ते जातो खात
एक दिवस पोळ्याला फक्त मिळतो आराम
मग बाराही महिने फक्त काम काम काम...
तुझ्या कष्टाने पोसल्या शेतकऱ्यांच्या रे पिढ्या
तुझ्या पायात असती शेताच्याच साऱ्या नाड्या
मूक तुझी ही सेवा रे शेतकऱ्याला भावते
म्हणूनच घरदार तुला देवच मानते ....

Author: ‎खबरबात

खबरबात™ (Khabarbat™) हे मराठी माध्यमातील लोकप्रिय वेबपोर्टल आहे. ताज्या बातम्यांसह डिजिटल अपडेट, राजकीय, सामाजिक, पर्यावरण, रोजगार, बिझनेस बातम्या दिल्या जातात. भारत सरकारच्या माहिती व प्रसारण खात्याच्या डिजिटल मीडिया विभागाकडे Intermediary Guidelines and Digital Media Ethics Code) Rules 2021 नुसार नोंदणीकृत आहे.