by दोघांना अटक, वैमनस्यातून गेम
नागपूर/प्रतिनिधी:
एका युवकाची क्षुल्लक कारणावरुन दारुच्या नशेत दोन मित्रांनीच निर्घृण हत्या केल्याची खळबळजनक घटना मानकापूर हद्दीत श्रीहरीनगर परिसरात शुक्रवारी रात्रीच्या सुमारास घडली.
मंगेश श्रावण खोटे (२८) रा. प्लॉट नं. ६१, गणपतीनगर, महाराजा अपार्टमेंट नं. २, च्या मागे स्वामीनगर असे मृतकाचे नाव आहे. जयकिशोर उर्फ जॉकी राजकुमार लोन्हारे (२८) तथा राजकुमार नंदलाल लोन्हारे अशी आरोपींची नावे आहेत.
पोलिस सुत्रानुसार, मंगेश, जॉकी व राजकुमार हे तिघेही मजूर असून सोबतच काम करतात. काही दिवसांपूर्वी मंगेश खोटे याच्यासोबत त्यांचा वाद झाला होता. यावेळी जयकिशोर याने त्याला जीवे मारण्याची धमकी दिली होती. मंगेशने याची माहिती आपली आई पुष्पा खोटे हिला सांगितली. तिने आपल्या मुलाला घेऊन लिन्हारे यांचे घर गाठले. यावेळी त्यांच्यात पुन्हा वाद झाला. त्यानंतर दोन्ही पक्षाने समजुत काढून वाद मिटविला. मात्र शुक्रवारी रात्रीला मंगेश हा राजकुमार यांच्या घरी जात असल्याचे सांगुन घरुन निघाला. तिघांनी बसून येथेच्छ दारु ढोसली, दरम्यान त्यांच्यात वाद झाला. दारु पिऊन असल्याने वाद विकोपाला गेला. आणि दारुच्या नशेत दोन्ही आरोपींनी दगडाने ठेचून मंगेशची हत्या केली. रात्र होऊनही मंगेश घरी परत न आल्याने आई पुष्पा ही शोधासाठी निघाली असता श्रीहरीनगर येथे त्याचा मृतदेह रक्ताच्या थारोळ्यात पडले दिसला. याप्रकरणी मानकापूर पोलिसांनी खूनाचा गुन्हा दाखल करुन दोन्ही आरोपींना अटक केली. पुढील तपास पोलिस निरीक्षक चव्हाण यांच्या मार्गदर्शनाखाली सुरु आहे.
