by नागपूरातील कॉलेज तरुणीचा खून
नागपूर, दि. १७ - गेल्या वर्षी नागपूरातील धनश्री रामटेके या तरुणीचा खून केलेल्या दोघा गुन्हेगारांपैकी एकाला न्यायालयाने फाशीची तर दुस-याला जन्मठेपेची शिक्षा ठोठावली आहे. धनश्रीचे दुस-या व्यक्तिशी संबंध आहेत, असा संशय घेऊन तिचा प्रियकर धरमवीर चव्हाण याने आपला मित्र सोनू उर्फ चेरी सदाशिव राऊतकर याच्या मदतीने गळा आवळून खून केला व मृतदेह जाळून टाकला होता. अतिरिक्त सत्र न्यायाधीश के. एल. व्यास यांनी काल गुरुवारी दोन्ही आरोपींना दोषी जाहीर केले होते. धरमवीर श्रीराम चव्हाण (२४) आणि पंकज ऊर्फ सोनू ऊर्फ चेरी सदाशिव राऊतकर (२२), अशी आरोपींची नावे असून दोघेही पलोटीनगर येथील रहिवासी आहेत. धनश्री नीळकंठ रामटेके, असे मृत कॉलेज तरुणीचे नाव होते. ती गिट्टीखदान पोलीस ठाण्याच्या हद्दीतील इंद्रायणीनगर येथील रहिवासी होती.
