by चंद्रपूर, २० नोव्हेंबर
विवाहाचा आनंदोत्सव साजरा करण्यासाठी फोडण्यात आलेल्या फटाक्याच्या आगीने परिसरातील दोन दुकाने जळून भस्मसात झाली. यात सुमारे ३ लाख ४० हजार रुपयांचे नुकसान झाल्याचा अंदाज दुकान मालकांनी वर्तविला असून, ही घटना बायपास मार्गावरील अष्टभुजा वॉर्डात मंगळवार, १९ नोव्हेंबर रोजी रात्री घडली.
बायपास मार्गावरील अष्टभुजा वॉर्डात मुजीबुल रहमान यांच्या मालकीचे टायर-ट्युबचे दुकान आहे. याच परिसरात असलेल्या एका सभागृहात मंगळवारी रात्री लग्न सोहळ्याचे आयोजन करण्यात आले होते. यावेळी आनंद साजरा करण्यासाठी फटाकेही फोडण्यात आले. दरम्यान, फटाक्याच्या आगीची ठिगणी पडून रात्री ११ वाजताच्या सुमारास दुकानाला आग लागली. यावेळी आग विझविण्याचा प्रयत्न करण्यात आला. तोपर्यंत दुकानातील ४० ते ५० हजार रुपये किंमतीची सर्व्हिसिंग मशिन व टायर ट्युब जळून खाक झालेत. यात रहमान यांचे ३ लाख रुपयांचे नुकसान झाले. त्यानंतर थोड्या वेळाने तसलिम खान यांच्या भंगार दुकानाला आग लागली. यात रद्दी व ५ हजार रुपये रोख जळून खाक झालेत. यात खान यांचे ४० हजार रुपयांचे नुकसान झाले. या घटनेची माहिती अग्निशमन विभागाला देण्यात आली. अग्निशमन विभागाच्या दोन गाड्या घटनास्थळी पोहोचण्यापूर्वीच नागरिकांनी आगीवर नियंत्रण मिळविले होते.
